2026世界盃：杜曹飲水時間教路收奇效 卡尼頭頂腳踢英格蘭有運行_東方日報

尋晚世盃32強賽事，英格蘭火併剛果民主共和國。「三獅兵團」喺早段閃電失守，最後憑哈利卡尼喺比賽末段梅開二度，以2比1反勝對手，驚險晉級16強，下場將會對墨西哥。今次係英格蘭史上第2次喺世盃反勝，對上嗰次，正正係66年決賽。

英格蘭開賽7分鐘後防穿大窿，薛賓卡喺無人看管下射近柱為剛果民主共和國先開紀錄。失波後嘅英軍似乎未瞓醒，攻門乏力，直至小息飲水後先稍有好轉，不過祖迪比寧咸同哈利卡尼嘅連番攻門，都過唔到馬柏斯十指關，半場英格蘭落後0比1。

反勝民主剛果現捧盃吉兆?
下半場英格蘭領隊杜曹換入安東尼哥頓同布卡約沙卡，但情況未見好轉，直到第2次「飲水時間」，杜曹召集全隊教路，重新部署戰術，果然演出大有改善，75分鐘，安東尼哥頓左路傳中，哈利卡尼門前頂反方向，今次馬柏斯就算拍到都入，英格蘭追和1比1。86分鐘，哈利卡尼喺3名守衞包圍之下推橫怒射死角入網，個人梅開二度，今屆累積5個入球，協助英格蘭以2比1反敗為勝。

英格蘭喺第2次飲水前只有2次攻門同7次禁區內掂波，飲水後就提升到6次射門同13次禁區內掂波，當然仲有哈利卡尼最重要嘅2個入球。杜曹賽後表示：「我用盡飲水時間嘅作用，你知我本來唔多鍾意呢個設計（飲水時間），我寧願比賽更加流暢，但既然已經成為定局，點解我唔用盡呢個好處？」事實上，英格蘭以往喺世盃落後多數輸波，今次只係球隊歷來第2次喺世盃反勝，而之前唯一一次，就係66年世盃決賽4比2反勝西德捧盃！