2026世界盃：進攻三叉戟火力猛 荷蘭大盤有着洛_星島日報

世盃32強上演火力對決，荷蘭同摩洛哥交鋒保證娛樂性十足，兩隊踢法都非常進取，「橙衣軍團」荷蘭喺分組賽已盡展火力，「進攻三叉戟」令人聞風喪膽。摩洛哥同樣有唔少天才進攻球員，為闖關必以最強搶攻戰術應戰，好大機會多入波，捧2.5球入球大穩陣。（Now 618、616及馬會指定場外投注處周二早上9時直播）文:工廠仔

荷蘭今屆表現出色，分組賽2勝1和首名晉級，3場比賽攻入10球，波貝比、加普同森馬維組成嘅「進攻三叉戟」，集合晒硬淨、技術同速度於一身，3人目前已經貢獻7個入波，加上死球攻勢都好犀利，華基爾雲迪積克同雲赫基一對中堅都有斬穫，荷蘭嘅進攻有睇頭。

摩洛哥連續9場有入波
進攻一向係荷蘭足球嘅DNA，朗奴高文帶隊亦貫徹呢種傳統，如果後防失波，就靠前面入多球搶番嚟。事實上荷蘭防守唔算穩陣，連續7場比賽都有失波，但好多時都可以靠進攻搭救，近4場賽事總入球全開3球或以上。

摩洛哥嘅演出同樣贏盡掌聲，佢哋雖然以小組次名出線，但其實同巴西同分，連續3場入波嘅翼鋒沙巴利已成球壇大紅人，效力皇家馬德里嘅巴謙戴亞斯亦盡展功架，加上夏基美嘅驚人助攻力，摩洛哥無懼同荷蘭駁火，大盤穩開。