2026世界盃：烏茲別克信心都輸埋 哥倫比亞速食半大最茲味_東方日報

世盃K組賽事，烏茲別克對哥倫比亞，首度出席決賽周嘅烏茲別克大賽經驗不足，開波初段隨時怯場犯錯失波。南美洲勁旅哥倫比亞擁有拜仁慕尼黑射手路易斯迪亞斯等進攻猛將，有力迅速入波，睇番哥倫比亞近4場有3次上半場總入球開2球或以上，首選中位數1.5球嘅半場大。

（Viu TV99、Now 618、616及馬會指定場外投注處周四早上10時直播）文:Mic少

烏茲別克歷史性打入世盃決賽周，該國足總隆重其事，上年10月聘請簡拿華路執教，希望以呢位意大利名宿捧2006年世盃冠軍嘅經驗，協助呢支亞洲球隊創出佳績。不過「大簡」以往教波成績實在不敢恭維，之前先後擔任中國隊、賓尼雲圖、烏甸尼斯、薩格勒布戴拿模主帥，結果都係幾個月貨仔就被炒魷，實在唔好對佢抱有太大期望。

烏茲別克信心都輸埋
雖然烏茲別克擁有曼城後衞卡胡辛洛夫，但單憑一己之力，恐怕難以支撐整條防線。加上烏茲別克近日踢2場熱身賽，分別不敵加拿大及荷蘭，進一步打擊球員信心。

至於哥倫比亞中前場人腳強大，除咗今季為拜仁攻入26球嘅路易斯迪亞斯之外，拍檔路爾斯蘇亞雷斯亦非常勇猛，加上老將占士洛迪古斯喺中前場串連，烏茲別克防線恐怕無力招架。哥倫比亞必定趁遇上弱隊，全力搶攻爭勝，為出線奠定基礎，上半場要入2球應該唔成問題。