世界盃：最弱主辦國加拿大亮相 波斯尼亞讓客掃落葉_東方日報

世盃B組，被視為3個主辦國當中實力最弱嘅加拿大亮相，第1擊喺多倫多布陣迎戰波斯尼亞。「楓葉國」加拿大依家受到傷兵困擾，對佢哋爭勝能力有保留；相反，經驗豐富嘅波斯尼亞踢法極穩陣，已經超過9個月未輸過波，今場受讓抵玩，讓球客勝[+1]咪錯過。

(ViuTV 99台、Now 618及630周六凌晨3時直播)文:工廠仔

加拿大歷來第3次踢決賽周，之前2次都喺分組賽出局，今屆佢哋首次喺自己國土出戰世盃，自然受到更高期望，球員亦承受更大壓力。美國籍領隊馬殊擅長逼搶踢法，不過球隊防守穩健之餘，進攻就好一般，過分依賴個別球員嘅靈光一閃，入球能力唔高，贏波機會亦大打折扣。

艾方素戴維斯係「玻璃腳」
本來加拿大都有好嘅進攻球員，但隊長艾方素戴維斯近年做咗「玻璃腳」，長期受大腿傷患影響，已經超過1個月冇比賽，上陣成疑；另一進攻主力馬些路科利斯，決賽周前重傷退隊，加拿大想旗開得勝有一定難度。加拿大今年踢4場熱身賽，只有1勝3和，當中對冰島、愛爾蘭兩支歐洲球隊都打和。

波斯尼亞有迪斯高、達巴高域、哥拉辛拿斯等老將壓陣，踢大賽嘅抗壓力同心理質素有保證，佢哋喺世盃外附加賽，就經歷過兩場互射12碼大戰先至出線，心態穩定性同韌力非凡。波斯尼亞踢法整體，防守硬淨，近8場賽事保持不敗，法定時間2勝6和，今場有望搶分，受讓值得捧場。