皇馬讓客「美」妙選擇

皇馬讓客「美」妙選擇 
 
皇馬因要出發去非洲摩洛哥踢世冠盃，所以佢哋本周嘅聯賽會特別推前，擺喺今日凌晨做西甲獨腳戲，適逢對手艾美利亞實力唔強，銀河艦隊讓兩球都有權開「讓客」壯行色。（周五27，now632及無綫網絡電視13頻道周六3:45am直播）

主隊艾美利亞近9戰僅嘗一勝，上周作客實力平平嘅升班馬伊巴都要慘敗2:5，近兩仗怒失8球咁多，最誇張係10月下旬至11月初經歷咗一次4連敗，最後靠悶和CF格蘭納達0:0先稍為止血，削到咁嘅地步，難怪只能夠喺西甲暫列倒數第4。其實艾美利亞嘅傷兵唔算多，只得兩個後衛包括施莫拿華路同埋莫路杜斯山度士倦勤，不過其他球員質素平平，就係佢哋戰績低迷嘅主要原因，首席射手艾加文迪斯都係得3球進帳，唔使我解釋，都知道艾美利亞有幾多料啦！

皇馬向20連勝進發

皇馬已經破晒紀錄取得19連勝，今仗再下一城就會達到20場連續贏波嘅新里程碑，雖然踢完歐聯冇耐又要踢西甲，下周二仲要喺非洲摩洛哥踢世冠盃，但由於呢幾個對手都唔算強，銀河艦隊寓賽於操問題唔大。沙治奧拉莫斯停賽，當係可以留力踢世冠，而占士洛迪古斯、基迪拉同埋莫迪歷就倦勤，不過皇馬仲有C朗、加里夫巴利同埋賓施馬等大球星坐鎮，加上艾斯高最近擔正後大演身價，是役火力全開可輕鬆報捷，即使要讓兩球咁多，皇馬都有權開出「讓客」。