拜仁入球大「中」到正

拜仁入球大「中」到正
 
歐聯E組除咗羅馬對曼城，拜仁對中央陸軍比賽其實亦關乎出線席位誰屬。陸軍今晚如果贏波，其實仍有機會攞到出線權，喺冇得唔攻情況下，絕對有利開出「入球騷」，中位數3.5球梗係買大。（周三3，有線63台周四3:45am直播）

拜仁近兩場聯賽都開魚生粥，開1:0連贏咗哈化同利華，喺咁情況下費格然依然推介捧入球大，其中一個原因係拜仁喺肯定出線下，會出多啲後備兵，但正因如比沙路、梳頓沙基利以及舒韋恩史迪加等球員，分別要操起狀態爭正選，或為吸引下手買家而努力，戰意反而更盛；再者，拜仁今輪有貝拿迪亞要坐波監，拿姆、畢斯杜巴又有傷缺陣，拜仁防線未必有想像中咁穩陣，隨時出現失波下，對開「大」自然更為有利。

陸軍有機出線未必死守

中央陸軍依家同曼城、羅馬都係得5分，如果曼、羅戰一個唔覺意打和，陸軍又爆到冷門攞3分，咁出線資格就會落喺佢哋手上，而就算唔得，陸軍都有機會爭降格踢之後歐霸搵銀，換句話講佢哋肯定唔可以坐以待斃，冇得死守下後防肯定留出更多空位，被拜仁取得大量入球，從而開個入球大俾球迷。