羅馬上盤「城」竹在胸

羅馬上盤「城」竹在胸
 
天助羅馬！呢支意甲首都球隊喺主場迎戰曼城，贏波肯定可以喺歐聯E組出線，唔使睇人面色，撞正藍月亮三條線嘅大將全部缺陣，個天好明顯鍾意羅馬多啲啦，平手、半球上盤可屠「城」。（周三4，有線61及201台周四3:45am直播）

歐聯E組睇落形勢好微妙，因為羅馬、曼城、莫斯科中央陸軍同得5分，力爭小組次名資格，最極端嘅爆冷情況係羅馬同曼城打和，中央陸軍又擊敗拜仁，咁就會由中央陸軍取得次名出線，但係正正常常之下，應該會估中央陸軍輸波，次名喺羅馬同曼城之間誕生，若然兩隊打成0:0，就會係羅馬出線，因為兩軍之前交手，羅馬作客曼城踢成1:1，變相有一個作客入波，所以如果踢成2:2，就會係曼城手握兩個作客入波出線，咁再踢成1:1呢？呢個時候就要計得失球差喇，鑑於羅馬曾經慘負拜仁，得失球差輸晒俾藍月亮，所以和波完全冇着數可言。
為免夜長夢多，羅馬最保險嘅方法梗係贏波攞3分，唔使睇其他人面色啦，而且個天似乎亦企喺呢支意甲球隊嗰邊，事關荷蘭國腳中場史杜特文已經復出咗，球隊上周意甲對薩斯索羅嗰陣，教練魯迪加西亞更加俾托迪、艾殊利高爾同埋謝雲奴先任後備休養生息，最近上位嘅比利時中場尼恩高蘭亦只係踢半場，擺明留力今仗。

曼城三線主力缺陣

相反地，曼城本身已經傷咗隊長兼後防主力高柏尼，中場耶耶托尼又繼續喺歐聯停賽，連最勇嘅阿古路都喺上場英超受傷，三條線嘅大將軍都缺陣，咪忘記大衛施華同埋祖維迪唔踢得，領隊柏歷堅尼想唔舉手投降都唔得啦，所以足智彩開讓球盤，羅馬讓平手、半球上盤穩如泰山。