加拉塔沙雷可秤「仙」

加拉塔沙雷可秤「仙」
 
歐聯D組例行公事，加拉塔沙雷雖然篤定包尾出局，連歐霸資格都冇份，不過今晚主場出擊，點都要向球迷交代，適逢阿仙奴已經肯定晉身16強，鬥心完全欠奉，加拉塔沙雷「讓主」要捧。（周二9，有線63台周三3:45am直播）

加拉塔沙雷個主場畢竟都係赫赫有名嘅地獄球場，雖然過晒氣，但係點都有啲威力，受讓一球咁多，唔買點對得住自己？中場恩蘭上仗領紅，是役自動停賽，不過呢支土耳其傳統勁旅仲有史奈達、迪斯馬利同埋咸美艾天托普等猛將坐鎮，前線又有彭迪夫，爛船都有三斤釘。

阿仙奴傷兵多兼冇戰意

阿仙奴攞住10分喺手，上輪擊敗多蒙特之後，已經提早宣布出線16強，呢場係例行公事，鑑於球隊上周英超不敵史篤城，全隊都受到好大壓力，加上本周會喺酋長球場硬撼紐卡素，預計兵工廠會留力，新人沙拿林、哥斯達黎加前鋒祖爾甘保，仲有經常埋怨冇正選踢嘅普多斯基應會悉數上陣，問題係佢哋嘅比賽狀態麻麻，久唔久先踢一場，試問又可以要求幾多呢？作客仲要讓對手一球，梗係買加拉塔沙雷「讓主」啦！