紅軍上盤橫「素」千軍

紅軍上盤橫「素」千軍
 
利物浦歐聯背水一戰，今晚只要喺晏菲路擊敗巴素利，就可以脫穎而出，同皇馬攜手躋身16強，成班球員當決賽咁踢，肯定會搏老命，足智彩開讓球盤，紅軍讓半球、一球上盤橫「素」千軍。（周二4，有線61及201台周三3:45am直播）

經歷咗4連敗之後，利物浦似乎真係洗心革面，連續4場比賽保持不敗，包括喺歐聯B組賽和盧多格德斯，另外英超連勝史篤城同埋李斯特城，上周就同新特蘭踢成0:0平手，海鮮味明顯冇咁濃，是役對巴素利只要贏波，就可以獲得7分，亦即以1分之微反壓對手成為小組第2名出線，當中關乎龐大嘅財政收益，玩嘢都唔揀呢一類場合啦！

列基林拔擔正有表現

巴洛迪利、史杜列治、蘇索同埋法拿根會繼續養傷，但係上述4人已經休戰咗一段日子，領隊羅渣士有晒部署，預料影響唔大，加上列基林拔呢排擔正都有唔錯表現，隊長謝拉特上場英超又先任後備，擺明留力踢歐聯生死戰，再配合佐敦軒達臣、拉爾拉拿同埋菲臘比古天奴等好波之人，紅軍今晚喺晏菲路肯定會搏老命。
巴素利喺瑞士聯賽已經5連勝，不過上場歐聯就僅負皇馬0:1，以致未可以確定出線，是役只要唔輸波就完成任務，預計會擺大巴死守利物浦，只係該隊防線唔算穩陣，右閘菲臘迪根更加係紅軍棄將，另外36歲嘅森美爾就年事已高，高空波要頂住列基林拔尚且可以，但面對又好波又快嘅史達寧就相當勉強，隨時成為缺口。

主場球迷成最大後盾

雖然利物浦今季實力唔算好強，不過人腳始終較巴素利優勝，加上許勝不許和嘅作戰心態，主場出擊又有球迷吶喊助威，贏面點都高啲，讓半球、一球合情合理，上盤絕對買得過。