阿仙奴「篤」定開讓和   喺傷兵滿營下，阿仙奴竟然打個3連勝出嚟，除咗講佢哋夠運之外，中前場夠穩定都應該要讚吓，不過今晚佢哋作客都要受考驗，因為兵工廠向來最弱一環就係面對死球防守，如果史篤城肯出「長人」高治打正選肯定令阿仙奴防線風聲鶴唳，當然阿仙奴前線齊人都可以以入球彌補失球數，一於賭佢哋僅僅贏一粒開出「讓和」。（周六28，now621台周六11:00pm直播） 史篤城3連敗，惟獨將保贊移到中路10號位置派牌，以佢巴塞出身波底，的確勝任呢份工作有餘，然而前線用曼聯舊將馬美迪奧夫唔掂，幸好高治傷癒，只要佢哋打番傳統英國波，對阿仙奴可能有更大威脅；而兵工廠雖然防守麻麻，但前線有個腳風大順嘅阿歷斯山齊士，再加埋基奧特及韋碧克，火力之強史篤城應抵擋唔住，阿仙奴應該會喺有失球下僅勝。