曼城讓主人見人「愛」

曼城讓主人見人「愛」
  
今晚英超由曼城對愛華頓壓軸，藍月亮呢排戰績回升，已經累積咗4連勝，相反拖肥糖喺快車檔期就得一分落袋，睇嚟對頻密賽程吃不消，所以足智彩開讓球主客和，曼城「讓主」人見人「愛」。（周六64，now621台周日1:30am直播）

曼城除咗大衛施華、高拉洛夫同埋迪斯高等傷兵之外，隊長高柏尼亦會喺今晚倦勤，好在藍月亮勝在人強馬壯，由迪米捷利斯夥拍文加拉打雙中堅一樣可解燃眉之急，加上阿古路同埋耶耶托尼最近腳風超順，前者更搶佔咗英超射手榜一哥位置，藍月亮有呢位阿根廷前鋒坐鎮，再食住近期4連勝嘅強勁氣勢，3分手到拿來。
愛華頓喺感恩節前後表現一般，上周被熱刺反勝2:1，周中主場對住實力普通嘅侯城又被迫和1:1，快車檔期得1分落袋，而且兩次都係領先下失分，作為球員當然覺得洩氣啦！兩位比利時國腳盧卡古同埋米拿拉斯近期入球頻頻，可惜都難以挽回球隊嘅弱勢，加上史東斯同埋賴史密夫等球員繼續倦勤，是役作客曼城難阻「讓主」開出。