車仔讓客渾身解「素」

車仔讓客渾身解「素」
  
霸氣車仔踩入聖占士公園球場，近況稍見回落嘅紐卡素睇嚟好難招架，事關藍戰士有迪亞高哥斯達坐完波監復出，而且保持緊跨季23場正式賽事不敗，故可大膽博「讓客」渾身解「素」！（周六15，now621台周六8:45pm直播）

紐卡素喺6連勝之後，狀態明顯回落，近兩場英超先負韋斯咸0:1，另外周中打和般尼1:1，加上曼聯、阿仙奴、史雲斯同利物浦呢排分別贏波，所以喜鵲嘅排名急速降至第九位，士氣同信心唔慌好得去邊，是役撼車路士難以樂觀。

紐卡素限米煮限飯

雖然穆沙施素高與哥爾碧克坐完波監復出，不過紐卡素嘅傷兵問題就一直惡化，告魯爾、路蘭度艾朗斯、奧巴坦、施安迪莊，仲有大衛辛頓都會倦勤，當中已包含新傷舊患，是役僅得隊長高洛仙尼可傷癒候命，領隊柏祖喺排陣上有制肘，只能限米煮限飯。
車路士周中喺倫敦打吡以3:0大勝熱刺之後，連續不敗紀錄已經增至23場，平咗摩連奴喺2007年創下嘅紀錄，今仗再保不敗就會改寫史冊，故即使尼曼查馬迪停賽，加利卡希爾又因傷缺陣，車仔全隊嘅士氣仍然非常高昂，加上摩連奴不斷幫球員減壓，多次強調唔稀罕以不敗身過終點，陣中戰將應該可卸下包袱，盡情享受比賽。

迪亞高哥斯達復出

迪亞高哥斯達坐完波監復出，上仗對熱刺叫好叫座嘅兩位前鋒杜奧巴同雷米應會退居後備，前線都咁多選擇，呢啲咪叫幸福的煩惱囉！咪忘記球隊仲有夏薩特、奧斯卡杜斯山度士同法比加斯等好波之人，故雖然藍戰士過去兩屆作客聖占士都輸波而回，但佢哋今屆霸氣迫人，絕對有望復仇成功，足智彩開讓球主客和，跟紅頂白都唔緊要，買車路士開2.33倍「讓客」渾身解「素」。