多蒙特讓主搶「芬」

多蒙特讓主搶「芬」
 
多蒙特喺德甲包尾，真係講都冇人信，不過呢個亦係事實，正所謂知恥近乎勇，廢如糞便嘅利物浦都識得反彈，蜜蜂兵團點解唔得？今晚主場對賀芬咸，多蒙特係時候開「讓主」重回正軌。（周五7，有線61及201台周六3:30am直播）

其實多蒙特未致於咁差，佢哋喺11月都贏過慕遜加柏，另外大勝加拉塔沙雷提前兩輪喺歐聯出線，近期輸俾阿仙奴只因放軟手腳，不過上周德甲不敵法蘭克福就要打屁股，只係以蜜蜂兵團嘅平均實力，抖擻精神喺主場出擊仍可信賴。池東沅、馬高列奧斯同埋曉姆斯等人仍然要養傷，但係教練高普已經有晒部署，而且馬菲亞斯真達、蘇保迪、紐尼沙軒同埋香川真司喺近期已先後復出，幾位攻擊球員好似奧巴美揚、阿祖安拉莫斯同埋恩莫比尼又冇傷冇病，球隊嘅得分能力有一定保證，唔愁冇波入。
賀芬咸季初嘅強勢已不復再，11月份只取得1勝3負，當中以0:4慘敗俾拜仁慕尼黑更加元氣大傷，雖然上周以4:3擊敗漢諾威止血，但係過程相當驚險，加上正副門將卡斯迪爾斯同史多斯同時受傷，後衛阿克普古馬同埋前鋒梅蘇拿亦會倦勤，是役未能以最佳陣容出征多蒙特，即使新晉巴西國腳羅拔圖法明奴今季大熟大勇，亦冇可能單天保至尊，受讓一球都唔樂觀。

往績剋住賀芬咸

往績方面，多蒙特上屆兩戰賀芬咸取得1勝1和，當中取得5個入波，建功嘅包括哥斯基奧斯、米希達利恩、奧巴美揚，同埋入兩球嘅比薛斯基，佢哋今晚全部可列陣，有利多蒙特開「讓主」。