愛華頓「侯」住開讓主

愛華頓「侯」住開讓主 
 
愛華頓今晚喺葛迪遜公園佈陣迎接侯城，3分可以話係手到拿來，因為佢哋嘅往績完全食住對手，而且老虎仔已經4連敗，近況直插谷底，想爆冷都冇本錢，拖肥糖「讓主」一定「城」事。（周三18，now624台周四3:45am直播）

雖然上周英超以1:2負於熱刺，但係愛華頓嘅演出並唔失禮，甚至一度由米拿拉斯建功領先，而被反超前之後，盧卡古、巴克里、艾登麥基迪，同埋後備落場嘅奧士文都不斷左右開弓，追唔番只係欠運，故此唔好太過睇低拖肥糖。事實上，米拿拉斯傷癒之後，球隊嘅前線有更多選擇，而另一中場占士麥卡菲亦接近復出，領隊馬天尼斯喺調動上將會更得心應手，加上愛華頓對上一次喺葛迪遜公園輸俾侯城，已經係1952年嘅事，超過半世紀嘅數據邊有咁易被打破！
侯城本身想爆冷搶分都唔容易，佢哋已經累積6場英超不勝，近4場更加全敗，當中輸俾曼聯、熱刺同修咸頓算係情有可原，但係對住實力平庸嘅般尼都要全失3分，就明顯見到侯城目前欠缺信心同埋士氣，快車檔期想翻身似乎太大想頭。雖然剛做老竇嘅艾保靴南迪斯已歸隊報到，但人腳始終不及拖肥糖，信愛華頓喺主場可順利開「讓主」。