阿仙奴讓半一「修」錢

阿仙奴讓半一「修」錢
 
阿仙奴兩連勝重回正軌，今晚喺酋長球場撞正輸波損士氣嘅修咸頓，一定要食住個勢再攞3分，難得兵工廠兩位攻擊重心近期着晒火，足智彩開讓球盤，阿仙奴讓半球、一球買上盤等「修」錢。（周三16，now622台周四3:45am直播）

兵工廠兩位攻擊重心阿歷斯山齊士同埋韋碧克呢期好旺，前者入球頻頻，夏天加盟後已火速奠定必然正選地位，而韋碧克就將國家隊嘅好表現帶返球會，上周英超1:0擊敗西布朗，就係靠呢位黑先鋒一箭定江山，唔好忘記另一法國射手基奧特已經復出，領隊雲格有更多選擇。

傷兵方面，阿仙奴仍然有韋舒亞、阿迪達、迪保治同埋奧斯爾倦勤，蒙利爾亦喺上周受傷，不過取代佢哋嘅球員尚算稱職，而且幾位骨幹好似梅迪薩卡同艾朗藍斯亦有穩定演出，加上法國國腳中堅哥斯尼已痊癒，捧場客可以放心。

修咸頓前季作客酋長吞6蛋

修咸頓上周英超慘負曼城0:3，今季主場不敗身被打破，作為球員又點會唔洩氣呢？不過細心啲去諗，修咸頓兵源唔算好充足，呢排魔鬼賽程連戰阿仙奴同埋曼市雙雄，見底都係意料之內，領隊朗奴高文限米煮限飯有咁嘅成績，已經好叻仔。
意大利新晉國腳加斯安奴柏尼連續4場食白果，係修咸頓近兩場英超只取得1和1負劣績嘅主因，加上球隊過去作客酋長球場表現一般，前屆仲試過吞6蛋，今仗都係正正經經捧阿仙奴開上盤啦！