車仔讓主炙手可「熱」

車仔讓主炙手可「熱」
 
英超周中上演倫敦打吡，唔識輸嘅車路士喺史丹福橋出擊，就算冇咗迪亞高哥斯達，都有權痛擊熱刺全取3分，畢竟對手熱刺嘅陣容亦唔完整，加上往績勁旺車仔，難怪「讓主」賠率炙手可「熱」。（周三17，now621台周四3:45am直播）

車路士上周英超俾新特蘭嘅鐵桶陣悶和0:0，不過無傷大雅，事關佢哋目前依然有6分喺手，甩開聯賽榜次席嘅曼城，而且今季喺各項賽事仍保不敗，無論係氣勢、信心及士氣，同埋陣容嘅板凳深度，都遠遠拋離另外19路雄獅，投注嘅朋友唔怕跟紅頂白。
迪亞高哥斯達停賽，對藍戰士攻擊力無疑有一定影響，但由於兩位後備前鋒杜奧巴同埋雷米都係質素超群，領隊摩連奴最終用邊個打正選，又或者排出雙箭頭攻堅，亦肯定令到敵衛聞風喪膽，因為車路士最煞食係中後場嘅支援，法比加斯同埋尼曼查馬迪攻守兼備，奧斯卡杜斯山度士、韋利安同夏薩特就突破力強，唔好忘記加利卡希爾、泰利同埋伊雲洛域等人亦係帶刀侍衛，要防止車仔入波真係好困難嘅事。
熱刺上場英超勇挫愛華頓，連埋歐霸盃在內已經取得3連勝，不過有睇波嘅朋友一定知道，熱刺呢幾場波都贏得唔輕鬆，蘇爾達杜身為當家射手，但都係幾日前先打破今季入球荒，全隊要靠哈利卡尼呢個新人撐住，其他老大哥真係顏面何存。

熱刺陣容不整難招架

事實上，熱刺目前嘅傷兵情況仍然嚴重，安祖斯唐辛、基爾獲加、丹尼路斯同埋艾迪巴約都未十足痊癒，上仗客串右閘嘅基利捷斯亦會倦勤，好在基爾洛頓坐完波監，否則仲大鑊，只係熱刺近幾屆都未嘗擊敗車仔，上屆喺史丹福橋更加慘敗0:4，北倫敦去西倫敦都唔係好遠啫，唔通咁都暈車浪？好難阻車路士開「讓主」喎！