羅馬主勝「米」已成炊

羅馬主勝「米」已成炊
 
今周意甲最受注目比賽肯定係羅馬主場對國際米蘭。國米雖剛由文仙尼接手，但球隊始終問題多多唔係一時三刻可以解決，相反羅馬級數喺聯賽僅次於祖記，主場出擊要攞3分唔難。（周日41，無綫網絡電視301頻道周一3:45am直播）

羅馬過去周中喺歐聯作客僅和莫斯科中央陸軍，想出線下輪分組賽仍要努力，但返到聯賽羅馬成績就穩定得多，始終對手大幅減弱咗嘛！事實羅馬近兩周聯賽全勝，主場亦累積近10戰8勝1和入26球佳績，超強火力非等閒之輩可以抵擋得到。

文仙尼革新國米需時

陣容方面，羅馬依然係有嗰幾個傷兵，即恩加麥比華、馬爾干、李安度卡斯坦、巴沙列堤同門將古斯，只係真正主力好似托迪、迪斯度、拿積、謝雲奴、迪羅斯同門神迪沙迪斯其實全數冇傷冇病可以候命，傷兵對人腳根本就毫無影響可言。
國米早排怒炒冇料教頭馬沙利，並改由前奪冠功臣文仙尼回歸接掌帥印，只係文帥就算你覺得佢叻唔叻都好，都冇可能即時令到本來就問題多多嘅國米，立即就可以重返強隊行列，睇佢哋上周對同樣唔多掂嘅A米，全場無甚優勢，僅有運下攞1分就可知一二。
最後，國米喺過去周中踢咗對迪尼普歐霸比賽，休息其實唔比喺俄羅斯趕返嘅羅馬多；再講球隊今周將有尼曼查維迪以及莊拿芬施些路兩位主力守將因傷倦勤，防線不穩下造訪羅馬難免又落於下風。