多蒙特讓和冇「蘭」度

多蒙特讓和冇「蘭」度
 
多蒙特喺今屆聯賽好似撞邪咁，就算打得好都要失分兼成日有主力受傷，球隊上周又損失咗主力馬高列奧斯，好在「蜜蜂兵團」今周對手只係法蘭克福，險勝攞3分唔係冇能力。（周日31，有線61、64、201及203台周一12:30am直播）

講真多蒙特近況真係麻麻，上周領先兩球下被柏達邦迫和，聯賽排到第17位，過去周中歐聯又輸埋俾阿仙奴；但從另一角度睇，多蒙特上周對柏達邦其實喺領先時踢得唔差，係失一個問題球影響咗士氣先令之後表現失準，如果今周唔再俾球證搞亂，以佢級數要贏番場反底唔係咁難。

法蘭克福被迫主守

陣容方面，多蒙特肯定有馬高列奧斯受傷，中堅柏柏斯達夫普路斯亦肯定唔打得，好在香川真司、奧巴美揚、米希達利恩同蘇保迪等三線主力都可上陣，令教頭高普喺排陣上仍有充足選擇。
另一個捧多蒙特原因，係主隊法蘭克福都唔好得去邊，上周意外贏慕遜加柏前曾連輸5場，加埋失咗15球之多，此外幾名前線主力禾特舒密特、希度華迪斯同華拉夫卡特歷都缺陣，預計法蘭克福會以守代攻，更增添多蒙特險勝開「讓和」機會。