修咸頓下盤不敢怠「曼」

修咸頓下盤不敢怠「曼」
 
修咸頓今季異軍突起，英超緊守次席之餘，喺聖瑪利球場更未嘗一敗，是役接受衛冕冠軍曼城挑戰，絕對有權製造驚喜賽果，藍月亮礙於名氣要讓平手、半球，買修咸頓下盤切忌怠「曼」。（周日14，now621台周日9:30pm直播）

自從10月上旬作客僅負熱刺0:1之後，修咸頓就一口氣打出個5連勝，包括喺聖瑪利球場大破新特蘭8:0，另外分別淨勝侯城同李斯特城1:0同2:0，英超同聯賽盃就兩勝史篤城，雖然上周聯賽以1:1迫和阿士東維拉，終斷咗連勝走勢，不過修咸頓嘅勢頭仲係相當好，後勁方面亦有保證。

朗奴高文點兵冇煩惱

門將加雲戴維斯、森加歷查、禾特普斯同埋積洛迪古斯都係原有傷兵，換言之球隊嘅十字軍並冇增加，領隊朗奴高文可以隨意揀選心水球員列陣，包括加盟後好評如潮嘅意大利射手加斯安奴柏利、英格蘭新晉國腳尼達利基尼，同埋塞爾維亞新援杜辛泰迪治，繼續做黑馬有乜咁奇？

阿古路英超一百次上陣

曼城近期亦連勝史雲斯同埋拜仁慕尼黑，但係贏波過程就一啲都唔輕鬆，周中歐聯力克拜仁，亦係趁對手長時間10人應戰，兼夾後防連番送禮所致，雖然前鋒阿古路腳風好順，而且今次係佢第100次英超上陣，可惜大衛施華呢位中場指揮官要繼續養傷，供應難免會少咗，加上迪斯高亦會倦勤，領隊柏歷堅尼嘅前線組合得番阿古路同祖維迪，變化唔算多，作客點讓得起？
事實上，兩軍過往交手都係主場一方佔優，就以近兩屆為例，修咸頓坐鎮聖瑪利球場對曼城獲1勝1和不敗佳績，更何況今屆嘅修咸頓明顯有大幅進步，而且英超主場作賽仲未輸過，當中包括擊敗阿仙奴等實力份子，今晚受讓開硬下盤。