車路士讓客萬象更「新」

車路士讓客萬象更「新」
 
今晚英超由新特蘭主場對車路士作為壓軸，黑貓近況冇乜特別，偶爾仲會輸鑊甘，是役真係螳臂擋「車」，藍戰士嘅不敗之旅勢必延續，足智彩開讓球主客和，車路士1.9倍「讓客」擒貓！（周六65，now621台周日1:30am直播）

普耶曾經喺車路士度過無數快樂時光，不過今晚佢就會率領新特蘭挑戰舊主，希望創造奇跡破對手不敗金身，只係要達成呢個願望確實有難度，先唔計兩軍實力差距，黑貓淨係近況都冇得比，近5場英超僅錄得1勝2和2負，當中更試過以0:8離奇慘負修咸頓，門將文路尼亦從此被打入冷宮，雖然改由前曼城門將彭迪利蒙把關之後，球隊的確失少咗波，但整體感覺仍脆弱。

黑貓攻不銳守不穩

荷蘭左閘雲安荷特因為有傷在身，是役無緣同普耶一齊倒戈，另外比利鍾斯、列卡度艾華利斯同埋基亞卓尼利都會倦勤，最慘係新特蘭防守唔穩之餘，攻力亦唔算特別強，今季12場比賽入12球，每仗平均1球，首席射手史提芬費查都係得4球進帳，完全冇殺手鐧，想爆冷天方夜譚。
車路士喺英超12戰10勝2和不敗傲視群雄，周中歐聯更加作客大破史浩克，提早一輪宣布躋身16強，好多球評家同埋傳媒都預測，今屆呢隊車仔會以不敗身喺聯賽封王，積分更會突破100大關，不過領隊摩連奴就好識得為球員減壓，多次強調無法重演當日阿仙奴不敗奪冠神跡咁話。

藍戰士好運傷兵少

事實上，車路士持續強勢，好大程度係因為佢哋班主力對辦之餘，又冇乜受到傷兵困擾，夏薩特、法比加斯、泰利、奧斯卡杜斯山度士，同埋周中歐聯踢半場嘅迪亞高哥斯達都可列陣，今晚強勢進擊光明球場，「讓客」當然冇問題啦！