史特加信「賴」讓客

史特加信「賴」讓客
 
大家冷靜啲聽我費格然講，今晚德甲周五獨腳戲，由弗賴堡主場對史特加，我貼包尾兼連續276分鐘冇入波嘅史特加開「讓客」，絕對唔係無的放矢，皆因佢哋有救火隊長，至少可保不敗。（周五26，有線61及201台周六3:30am直播）

弗賴堡近況無疑係唔錯，近4戰獲3勝1和不敗，包括德國盃大勝1860慕尼黑5:2晉級，另外擊敗科隆同史浩克04，不過佢哋上周就俾緬恩斯臨尾追和2:2，球員都相當洩氣，而且主力沙斯查列達、美國外援卡雷布史坦高、法國後衛基斯杜化祖利安，仲有門將丹尼爾畢斯都會因傷倦勤，是役唔可以夫添出擊，中後場更加係十字軍重災區，即使失分亦唔係完全冇可能。
史特加計戰績當然蝕章啦，因為佢哋今屆12場德甲得9分墊底，近3戰仲分別不敵禾夫斯堡、雲達不來梅同埋奧格斯堡，累積276分鐘冇入波，但係原教練韋爾已經好識做，輸完俾奧格斯堡之後自動辭職，球會即時請番史提芬斯嚟任教。

新帥史提芬斯護級專家

須知道呢位荷蘭教練上屆亦係季中接任，成功做救火隊長，幫史特加護級上岸，只係唔知最後點解唔續約，而家搞下搞下，史特加高層都係「還是覺得佢最好」，士氣加分之下，今晚至少開「讓客」保不敗。