专家拆局：热刺抢胡主Ｗ要爱

热刺抢胡主Ｗ要爱

今晚英超压轴尾场，热刺喺主场迎战「拖肥」爱华顿，双方主帅摩连奴及安察洛堤大斗法。热刺勒紧裤头冇得大事增兵，不过「寸王」作出两个针对性收购，相信会令球队有所提升，反而爱华顿临开咧前先係咁买人，占士洛迪古斯等新兵根本未够时间磨合，加上摩连奴开咧战特醒，主胜值得捧场。

贵为一代名帅，摩连奴同安察洛堤嘅关係都几微妙，既因分别执教米兰双雄而成为死对头，「肥安」亦喺摩连奴打下基础后，接手车仔同皇马获得成功，有啲「行运医生医病尾」feel。当然佢哋近年都有回塘迹象，「寸王」执教曼联嗰阵备受抨击，「肥安」上一份工就畀拜仁炒鱿鱼，两人均不惜纡尊降贵执教多年无冠嘅热刺及「拖肥」，都係想喺英超重新证明自己。

因疫情令收入大减，令摩连奴冇得好似教皇马、曼联咁大洒金钱买人，不过今夏购入贺积查治同马特杜靴迪，前者属为「寸王」最锺意嘅「打仔格」中场，呢位丹麦国脚既可作防线前屏障，亦能串连攻守，马特杜靴迪作为右翼衞做到瞻前顾后，效率极高，解决自捷比亚上季离队后，热刺右路攻守问题。唔好忘记，前线嘅哈利卡尼同孙兴民，係英超最具杀伤力嘅进攻组合之一，热刺近乎原班人脚出战，默契十足。

「肥安」丧买人爱华顿未磨合

相反，爱华顿主帅安察洛堤今夏着力建立自己班底，近日接连罗致杜哥利、阿伦卢利奥及「J神」占士洛迪古斯，「J神」仲要係免费，大家都等睇「肥安」点样重新激活呢位2014年世盃金靴得主，佢哋质素唔错，但问题係加盟冇耐，夹都未夹过，仍需时间适应，好难即刻发挥作用。

睇番热刺近3季联赛开锣战全胜，虽然3战均非摩连奴领军，但「寸王」好要面唔衰得，何况佢执教曼联及两教车仔期间，曾9次领军打联赛开咧战，豪取8胜1和佳绩，可见摩帅好重视开咧战。加上近4次同「肥安」正面交锋都赢波，包括上季季尾热刺主场1比0小胜「拖肥」，今仗有力打响头炮。

此文章内的所有观点和内容皆为作者个人意见，并不代表999体育观点；文章所示的任何数据和资料仅供合法中国体育彩票参考及交流之用。

任何公司或自媒体如需转载，请标注“转载自999体育”，严厉打击任何抄袭行为，我们将保留法律追究的权利！