专家拆局：欧霸席位之争皇苏顶到马体会

欧霸席位之争皇苏顶到马体会

除咗护级之外，西甲煞科另一焦点，必属欧霸席位之争，竟然仲有4队有机会争剩番1张入场券，其中马德里体育会主场对皇家苏斯达值得留意。马体会已稳夺欧联入场券，唔慌会搏，相反皇苏赢波即保住前6嘅欧霸席位，季尾波战意行先，让球客胜咪错过。

第6至第9位随时大执位

西甲嘅3个欧霸席位，原本係由第5及6位，以及西盃冠军瓜分，但由于西盃决赛毕尔包对皇家苏斯达，仍未定出比赛日期，若果未能喺8月头举行，西盃嗰张入场券就由第7位取代，当然一切言之尚早，现阶段嚟讲前6先肯定有资格。现时5哥维拉利尔领先7哥基达菲3分兼对赛佔优，肯定有份踢欧霸，而由第6至第9位嘅皇苏、基达菲、华伦西亚及ＣＦ格兰纳达，只有2分差距，煞科日后随时大执位。

讲番马体会对皇苏，前者摆脱停摆前嘅低迷，复赛后10场取得7胜3和，现居第3位兼取得下届欧联入场券，可谓完成任务，嚟紧係等待欧联重开再搏过，加上「新Ｃ朗」祖奥菲历斯未好番，攻力受削。

另一边厢，原本有力争取前4嘅皇苏，复赛后频频失分，好彩近期终于止跌，近5仗联赛取得2胜2和仅1负，依家排第6位，领先7哥基达菲1分，即係话今仗只要赢波，就肯定保得住欧霸入场券，斗心更胜马体会，仲有得受让，让球客胜有计。