恩莫比尼同意續約5年！粉碎曼聯美夢英國《太陽報》指曼聯領隊蘇斯克查睇中拉素前鋒恩莫比尼，計劃將代表首席射手嘅9號球衣交畀佢。不過，最新消息指呢位30歲意大利國腳已經同意同拉素續約5年，令蘇B夢碎。意大利傳媒指，拉素向恩莫比尼開出1份至2025年夏天嘅新合約，年薪將達到400萬歐元，如果佢完成呢份合約，屆時已經35歲，隨時效力拉素至掛靴。恩莫比尼今季意甲上陣26場入27球，仲多過球王C朗6球，好大機會成為今季意甲神射手，拉素梗係想盡快綁實佢。拉素現時僅落後意甲榜首祖雲達斯1分，球隊將於6月25日凌晨作客阿特蘭大，恩莫比尼同意續約可穩定軍心，提升爭標士氣。至於曼聯雖然成功向上海申花續借前鋒恩哈路，但為長遠着想，始終需要收購1位射手，收購恩莫比尼失敗之後，惟有搵其他人選。