諷華人播病毒　阿里停賽1場無緣鬥曼聯

諷華人播病毒　阿里停賽1場無緣鬥曼聯熱刺中場迪利阿里於今年2月在社交網上嘲諷華人散播病毒事件，英足總有判決，判罰阿里停賽1場及罰款5萬鎊，英超復賽首仗對曼聯無緣上陣。今年2月初迪利阿里在社交網上載影片，片入面佢喺機場偷拍一名中國口音男子講嘢，話對方就係新冠肺炎病毒，又開玩笑話新冠肺炎病毒唔夠佢跑得快，所以「捉佢唔到」。當時新冠肺炎正在中國爆發，尚未波及到歐洲。影片遭網民炮轟，指佢涉嫌種族歧視、侵犯私隱以及作出不適當言論，阿里事後已急急刪片並道歉，不過英足總當時已表明會展開調查，結果足總對阿里判罰停賽及罰款，並在聲明中表示，阿里觸犯涉及侮辱及不當行為，因而作出處罰。迪利阿里透過熱刺官方再次道歉，佢喺聲明中表示：「這是一個低級拙劣嘅笑話，新冠肺炎對人們嘅影響遠超我嘅想象，感謝足總認為我係冇心，無意作出種族歧視，我會好好注意自己言行。」