西甲重開　美斯挑戰2項神紀錄西甲復賽，傷愈嘅美斯將會率領巴塞隆拿作客馬略卡，呢位阿根廷球王喺今季餘下時間將會挑戰2項神紀錄，就係西甲神射手及巴西傳奇球王比利嘅入球紀錄，即管睇吓佢能唔能夠延續傳奇之旅啦。力爭第7隻金靴再追比利先講西甲金靴獎，美斯過去曾經奪得6次西甲金靴，已經追平50年代名宿畢爾包射手薩拉紀錄，今季美斯暫以19球領先射手榜，比第2位嘅皇馬前鋒賓施馬多5球，只要保持狀態繼續有貨交，美斯就可以7奪西甲金靴，獨佔贏得西甲金靴獎次數最多榮譽。第2項神紀錄係關於球王比利，比利喺巴甲球會山度士效力19年攻入643球，保持單一球會入球最多世界紀錄，美斯效力巴塞隆拿16年，累積攻入627球，只差16球便可追平此紀錄，如果美斯未能喺今季實現呢個目標，就要留待來季完成。