可能係世上最慘外援　加納國腳要機場乞食新冠肺炎疫情嘅影響，差不多全世界嘅體育比賽都停擺，球員更加腳停口停，效力印度喀拉拉特邦的加納國腳梅拿有家歸不得，依家每日喺機場游盪，流落街頭，相信係世界球壇嘅最慘外援。梅拿半年前由經介紹去到印度，點知去咗唔夠兩個月就遇上新冠肺炎疫情，球賽無得踢，諗住回家，本來3月底肯尼亞航空有飛機去加納，但因為航空封鎖所以無飛機回家，唯有迫住瞓機場，最慘係僅有嘅生活費都慢慢用清，好彩每日機場都有人嚟送食物、捐毛毯。有家歸不得呢個慘況，梅拿每日都利用社交平台上載消息，等咗70幾日，孟買足協主席睇到梅拿嘅情況立即出手安排一間酒店畀佢住，終於過番少少正常人嘅生活，而最新消息係加納方面會盡快安排救援飛機畀佢返屋企。