改造熱刺　寸王睇中呢隻狼「寸王」摩連奴執教熱刺已有大半季，不過暫時未能交出成績，法國傳媒報道，寸王今夏將會出手，收購幾個合自己心水嘅球員，當中包括狼隊防守中場魯賓尼維斯。法國傳媒《Le10Sport》報道，摩連奴睇中魯賓尼維斯，不但因為佢來自葡萄牙波圖，係摩連奴同鄉，而且其經理人門德斯亦係摩帥用開嗰個，為寸王製造挖角有利條件。狼隊有好多葡國兵，寸王只睇中魯賓尼維斯，皆因呢位防中最擅長打反擊，攻守轉換時嘅長傳一流，啱晒摩連奴「泊大巴」嘅打法，因此寸王希望得到呢位23歲球員，從而改造熱刺踢法。報道指，魯賓尼維斯同狼隊合約到2023年到期，寸王想說服佢過檔，相信要落唔少嘴頭。