賓菲加失分遇襲！2位球員割傷送院

賓菲加失分遇襲！2位球員割傷送院葡超重開之後，連環爆大冷，繼早1日榜首波圖1:2輸畀法馬利卡奧之後，排第2位嘅賓菲加亦於周五(5日)凌晨失分，主場同唐迪拉打和0:0，竟然連1.13倍熱W都開唔出，中位數2.5球嘅1.54倍入球大亦唔中，賭仔今次真係欲哭無淚。葡萄牙傳媒指，賓菲加球迷對於球隊差劣表現，感到憤怒，賽後向球隊巴士掟石頭，前鋒安迪查施夫高域、中場祖利安韋高被車窗玻璃碎片割傷，需要入院治療。由於閉門比賽，賓菲加喺觀眾席掛上大量頸巾，營造氣氛，但無助球隊表現。賓菲加係今季葡超攻力最強球隊，24戰入52球，但今場腳頭無靈，攻極都唔入，首席射手卡路士雲尼斯奧斯踢到74分鐘就被換走，似乎休戰太耐，狀態仍然不足。賓菲加和波取得1分之後，現時同波圖同分，今季爭標形勢非常激烈。另一支老牌勁旅士砵亭亦失分，球隊即有前鋒安達斯史保亞梅開二度，但作客被甘馬雷斯逼和2:2。