德甲:利華拜仁再演入球騷 王牌射手大比併

利華拜仁再演入球騷王牌射手大比併周六晚德甲前列大戰，利華古遜主場火併拜仁慕尼黑。利華新人王夏維斯士哥停不了，上輪再創新紀錄，為爭下屆歐聯入場券，必定施展渾身解數；拜仁箭頭羅拔利雲度夫斯基已入勻今季德甲17支對手，欲盡快鎖定聯賽8連霸料亦唔會退縮，今場鬥攻格局，中位數3.5球照捧大盤。（無綫85台、Now670、有線651及611台周六晚9時30分直播）利華古遜嘅夏維斯係目前德甲最炙手可熱新星，踏入2020年之後，呢名20歲小將喺聯賽攻入9球兼交出7次助攻，上場贏弗賴堡之役又一箭定江山，令佢喺德甲累積35球，力壓前西德名將菲沙，成為德甲史上首位21歲或以下、能夠攻入35球嘅球員，狀態弗爆。排第5位嘅利華目前與「4哥」慕遜加柏同得56分，落後排第3嘅RB萊比錫2分，比起「2哥」多蒙特亦只相差4分，為搶下屆歐聯參賽資格，1分都不能少。睇番利華近6次聯賽主場對拜仁攞到2勝3和1負，而且今季首循環利華曾經作客擊敗拜仁，計往績唔輸蝕，主場出擊有本錢鬥攻。近6交手轟27球拜仁近15場聯賽豪取14勝1和，現時喺榜首有7分優勢，不過吸取上季煞科日才驚險奪冠嘅教訓，為免夜長夢多，相信拜仁亦會主動出擊。拜仁今季聯賽已攻入86球，距離隊史單季聯賽最多入球嘅102球只差16球，王牌射手羅拔利雲度夫斯基上場對杜塞爾多夫梅開二度，完成「通殺」今季17支德甲對手嘅壯舉，並喺各項賽事累積入43球，追平個人單季最多入球紀錄。既然兩軍射手都咁弗，加上雙方近6次交鋒一共合力炮製27球，當中5次總入球開4球或以上，大盤由中位數3.5球起跳都唔驚，照追入球大。