基於球例　德國足總被迫調查辛祖以查頓辛祖為首嘅3名球員，周一被德國足總介入調查，原因係佢哋在賽事當中剝衫及展示標語，觸犯國際足球規則。辛祖等人行為係抗議近日發生嘅美國警暴及種族歧視，德國足總亦好坦白，話今次調查都係迫於無奈。多蒙特前鋒查頓辛祖、阿舒拉夫，以及史浩克04中場韋斯頓麥堅尼，在上場賽事都有抗議行為，其中查頓辛祖入波後更剝衫，露出寫上「為弗洛伊德尋求公義」嘅底衫。由於國際足球條例早有規定，比賽期間球員剝衫會領黃牌，在場上展示任何性質標語都會犯禁，因此德國足總就今次事件，都要調查一下，不過足總主席基拿(FritzKeller)都好明白事理，佢不但唔會向球員施壓，更向球員表示支持同讚賞：「我非常尊重球員嘅立場，我哋需要好似佢哋咁嘅球員，我為佢哋感到驕傲。」