阿仙奴執平貨　1300萬鎊買巴塞中場

阿仙奴執平貨　1300萬鎊買巴塞中場阿仙奴領隊阿迪達一直想簽入中場，代替將於今夏離隊嘅丹尼施巴路斯，根據英國《每日郵報》爆料，呢位西班牙少帥最新打算向母會巴塞隆拿埋手，收購對方中場拉芬拿艾簡達拿，預料1300萬鎊轉會費就有交易。阿迪達原本希望收購馬體會中場湯馬士柏迪，但由於呢位加納國腳身價達5000萬鎊，令兵工廠卻步，依家轉為斟拉芬拿艾簡達拿，成功機會比較高，因為巴塞計劃今夏出售多位球員，現時被外借去切爾達嘅拉芬拿艾簡達拿，屬於被清洗嘅大熱門，所以巴塞唔介意以1300萬鎊沽貨。現年27歲嘅拉芬拿艾簡達拿係巴塞青訓球員，但事業發展唔及效力拜仁慕尼黑嘅哥哥堤亞高艾簡達拿，拉芬拿近年已經兩度被外借去切爾達，亦試過被外借去國際米蘭，猶如「人球」被踢來踢去。拉芬拿艾簡達拿今季為切爾達踢咗17場西甲入2球，表現只屬一般，但阿仙奴貪平，就唔好要求有質素