車路士睇中蜜蜂門神　踢走Kepa效力車路士2年嘅西班牙門將阿列沙巴拿加日漸失勢，季中林柏特曾以韋利卡巴尼路把關，近日英國傳媒爆料，會方睇中多蒙特門將路文貝基，其身價只需1500萬鎊(約1.42億港元)，準備簽佢再踢走Kepa。英國《太陽報》報道，29歲嘅路文貝基代表瑞士上陣9次，在德甲上陣超過150場，有足夠能力在英超立足，據報道林柏特如成功簽入路文貝基，將打算以佢為球隊長期1號門將。阿列沙巴拿加2年前以破球會紀錄7160萬鎊加盟，可惜加盟以來甩漏太多，沙利執教期間因拒絕被換出，連累車路士痛失聯賽盃，林柏特執教期間，Kepa無法取得領隊信任，車路士亦決定止蝕將佢送走，據稱華倫西亞有意借用。