歐霸盃:落後2粒同阿仙奴玩大佢 拿玻里攻！攻！攻！

落後2粒同阿仙奴玩大佢拿玻里攻！攻！攻！今晚歐霸8強次回合爆發重頭戲，阿仙奴要作客硬撼拿玻里。阿仙奴雖然揸住兩粒喺手，但佢哋客場不嬲好「大」喜「攻」，拿玻里為收復失地，已冇退路一定狂攻，勢必合演入球騷，2.5球嘅大盤有買趁早。(myTVGold303、Now643、有線616及656台周五凌晨3時直播)首回合阿仙奴憑艾朗藍斯入波及對方擺烏龍，喺主場贏拿玻里2比0先拔頭籌，今仗只要打和，或者只輸1粒都可晉級，不過「兵工廠」一向主強客弱，近8場正式賽事作客僅得2勝1和5負，包括上2圈歐霸淘汰賽客場輸畀實力一般嘅巴迪同雷恩，都只係靠主場上演絕地反擊出線，可見作客幾咁唔掂，短期內難有改善。兵工廠客場病未醫好其實，阿仙奴近4仗歐霸淘汰賽共轟9球，有3場開3球或以上，既然「客場病」未醫好，倒不如火力全開，博入作客入球逼死拿玻里算數。落後兩粒嘅拿玻里已冇晒退路，為晉級唔單止非勝不可，仲至少要入番2粒先有價講。不過呢支意甲「2哥」近期入得又失得，聯賽連盃賽在內，近7仗入14球但失咗12粒，有5場開3球或以上，前鋒米利克同梅頓斯都算弗，問題係今仗焗攻冇得縮，防線隨時暴露更多空位，啱晒擅打反擊嘅阿仙奴雙鋒奧巴美揚同拿卡錫迪，2.5球嘅入球大乃不二之選