國冠盃:ICC壓軸戰吹細風

一向都有話：「開心嘅時間過得特別快，又係時候講Byebye！」原來眨吓眼ICC踢咗接近一個月，聽朝早已經嚟到最後一場，壓軸戲碼係馬德里體育會對國際米蘭。不過接住落嚟，我哋作為香港球迷，一定要力撐自己友啦！香港亞運男子足球代表隊尋日已經開始踢分組賽，順利以3比1力挫老撾旗開得勝，果然勁揪，信心應該提升唔少。嚟緊下星期三第2場對中華台北，之後仲要惡鬥巴勒斯坦同埋東道主印尼，大家一定要繼續黐住奇妙電視同有線電視嘅直播，一齊幫港隊打氣呀！馬體會守得國米難入波回顧今屆ICC，唔少場次都和波要互射十二碼分勝負，大手交易嘅其實唔算好多，尤其愈接近開咧，就見啲球隊踢得愈小心。踏入8月以來踢嗰7場入面，只得2場開出入球大咋。今場對賽嘅馬體會同埋國米都係以防守見稱，尤其是馬體會，佢哋雖然缺少核心主力在陣，但「施蒙尼式」嘅防守戰術，其他球員依然演繹得唔錯，着重防守唔會貿然進攻，往往令對手十分頭痕。至於國際米蘭，呢屆ICC除咗新發現拿達路馬天尼斯呢位新星之外，講真整體表現真係無乜特別，進攻能力又未見銳利，真係戥佢哋擔心。呢場ICC將會喺馬體會主場萬達大都會球場舉行，上年皇家馬德里、巴塞隆拿嚟到都只係和波而回，皇馬就更係連波都攻唔入，咁可以想像以國米嘅攻力，要破馬體會條防線真係談何容易，既然係咁，大家都可以推論呢場交收唔會太多啦。（奇妙電視77台、有線602及662台周日凌晨3時直播）