國冠盃:新兵爭上位巴塞遇羅馬大報復

國冠盃美國站壓軸戰，周三早上巴塞隆拿將會火併羅馬。今夏多位加盟巴塞嘅新兵，包括兩位巴西猛將艾法亞美路同馬爾甘菲臘比，為咗博正選位置，肯定搏盡力爭入波，加上巴塞近年同羅馬交手都常演入球騷，呢仗中位數2.5球入球大冇走雞。（有線602及662台周三早上10時直播）上季巴塞同羅馬喺歐聯8強狹路相逢，首回合以4比1搶得巨大優勢，可惜次回合巴塞明顯低估咗羅馬嘅實力，竟然畀對手以3比0擊敗，最終因作客入球成績不及羅馬遭淘汰，8強止步，呢次兩軍再次相遇，雖然賽事重要性冇得比，不過巴塞肯定希望以牙還牙擊敗對手。尤其巴塞新一季正選位置競爭激烈，除咗有多位新兵，仲有唔少邊緣人物，同埋青訓球員，都想博得主帥華爾維迪歡心，呢場肯定會狂入波爭上位。本來有望加盟羅馬嘅馬爾甘菲臘比，最後一刻畀巴塞截胡，令羅馬痛失呢位巴西猛將，兩軍因此結怨，呢仗為報仇，羅馬都肯定唔會留手。睇番往績，兩軍近6次交手，總共轟入23球，其中5次開3球或以上，呢次兩軍鬥攻格，入波肯定唔會少，中位數2.5球入球大捧得過。