美聯:銀河主場大爆發

伊巴謙孭飛強攻奧蘭多城聽朝美職壓軸好戲，由洛杉磯銀河喺主場硬撼奧蘭多城；銀河啱啱喺洛城打吡激戰下搶番1分，王牌伊巴謙莫域冇波入都貢獻助攻，士氣大振，呢班波一向有前冇後，咁啱奧蘭多城又連續15仗聯賽有失波，防線弱不禁風，主勝太熱冇肉食，轉捧有2.05倍嘅入球大（3.5球）仲好路。（無綫myTVSUPER303台周一早上9時30分直播）神鋒伊巴謙莫域唔係浪得虛名，佢加盟銀河後已經入咗12粒；單計聯賽，銀河近8仗取得4勝4和佳績，升上西岸第4位，包括上周中嘅洛城打吡，銀河該仗喺落後兩球嘅劣勢下，完場前8分鐘省番2粒逼和FC洛杉磯2比2，伊巴謙莫域雖然冇波入，但就交出助攻畀隊友阿歷辛迪尼建功先追1粒，成為最終打和嘅還魂丹。銀河踢法向來都有前冇後，近6仗聯賽入咗17粒，全部開4球或以上，火力之強真係攻到你暈。客軍殘陣防線穿窿另一邊廂，東岸排第9嘅奧蘭多城愈踢愈沉，單計聯賽，近15仗聯賽慘得4勝11負，張成績表見到都唔開胃，而且奧蘭多城場場有失波，喺呢15場聯賽入面狂失37粒，防線猶如不設防，今仗仲有幾位主力包括史達杜夏、魯杜域辛尼及史碧達受傷，舒恩奧尼爾又要坐波監，點同銀河鬥呀？不過銀河主Ｗ得1.45倍，計落冇乜肉食，既然佢哋咁攻得，再加上奧蘭多城條防線仲衰過豆腐渣，不妨直取3.5球嘅大盤好過。