紅牛唔“阿”支阿咗

紅牛唔“阿”支阿咗

世界盃外圍賽歐洲區G組大局已定，榜首的西班牙主場迎戰阿爾巴尼亞，縱有摩拉達因傷退出，但紅牛整體人腳仍高幾班，要在主場再贏一場絕無困難。

西班牙在九月兩場外圍賽連炒意大利及列支敦士登，以廿二分穩住榜首，今仗再贏即確保首名出線，戰意高昂。雖然比基在國家隊去向未明，或多或少動搖軍心，不過獲主帥盧比迪古開腔力撐，比基仍有望擔正，與拉莫斯扼守中路。比基亦否認與拉莫斯不和，再配合門神迪基亞，防守有十足信心。紅牛前線縱缺摩拉達，但伊斯高、阿辛些奧及卡利祖等領軍進攻，火力仍強。阿軍篤定無緣出線，戰意成疑兼作客，攻守兼備的西班牙可望順利贏波。

面對西班牙近日的政治風波，主帥盧比迪古再提醒球隊要集中精神：“這一刻沒有比對阿爾巴尼亞更重要的事，我希望球隊及球迷都能專心一致，迎接今仗。我們是足球員、足球教練，至少目前這一刻，應該將注意力集中在比賽上。我們要踢一八年世界盃，目標就是如此簡單。”

意軍火力冇停頓

意大利只需一分即可鎖定次席至少可踢附加賽，主場鬥馬其頓人腳及實力均贏幾條街。恩莫比利今季狀態大勇，配合恩悉尼及貝拿迪斯治攻堅，火力有保證。防線有保方及捷連尼等把關夠信心。尾二的馬其頓八戰入十球的攻力算合格，不過防守表現差，作客意大利凶多吉少。

以色利作客魚腩列支敦士登，兩隊無緣出線今仗成例行公事，主隊小組八戰全敗，以軍牌面佔優下有望贏波。