英軍主場“立”威

英軍主場“立”威

     英格蘭在世界盃歐洲區外圍賽F組一枝獨秀，同組對手實力威脅唔大，直入決賽周應該問題不大。今晚主場迎戰弱旅立陶宛，“三獅軍團”全取三分冇走雞，只係初盤開出英格蘭讓兩球／兩球半，“三獅”能否波盤全收？

    英軍球員一向作戰態度非常認真，由頭到尾去到盡，只要前線加強把握力，值得考慮“三獅”可以贏波贏盤。英軍雖有朗尼、夏利卡尼、亨達臣與史杜列治四大主力因傷缺陣，前線火力無疑受一定影響。不過，日前作客德國一場熱身賽中，“三獅”表現相當對辦，與德國互有攻守拉成均勢，埋門機會唔少，球員亦發揮出應有水準，只稍為欠缺運氣。由於今場對手實力實在較弱，“三獅”軍大勝可期。

    立陶宛只屬歐洲三四線球隊，足球水平根本難與英超相比，雖則有部分球員在國外搵食，但亦非歐洲主流聯賽，球員質素有限。球隊作客戰力相當弱，近兩戰不敵斯洛伐克與捷克，兩場共吞七球，今仗目標輸少當贏。