祖記再贏“波”

祖記再贏“波”

    意甲班霸祖雲達斯在歐冠盃十六強首回合，反客為主兩球淨勝波爾圖。明晨主場再戰對手，除非祖記“玩嘢”，否則過關入八強冇走雞。

    波爾圖主場被祖記狂攻，完全處於捱打狀態。射門次數祖記十八次四中，波爾圖只得三次兼零中目標，控球率更只得三成。最大原因，廿多分鐘波爾圖守將泰利斯被罰離場成為轉捩點，本身實力已經稍為不及祖記，再打少一人，難免被祖記“撳住打”。波爾圖要在次回合絕地翻身，恐怕相當艱難。

    當然，巴塞羅那都可以神奇生還，任何事的確都會發生。波爾圖盡地一煲，希望再創奇蹟。但以波論波，祖記勢不可當，尤其無敵主場，今季各項賽事未嘗一敗，十五場意甲與意大利盃全勝，歐冠分組賽亦未輸過一場。今仗對住手下敗將的波爾圖，祖記冇甩拖。

    波爾圖今戰誓必全力一拼，前線有咁大擺咁大。不過，祖記攻擊力明顯更強，鬥攻，波爾圖只會弄巧反拙。初盤祖雲達斯讓半球／一球，捧祖記再下一城。

    推介：祖雲達斯2:1