皇馬大“斯”殺

皇馬大“斯”殺

    皇馬之前被華倫西亞殺個措手不及，未夠十分鐘連失兩球，唔見三分又被巴塞與西維爾逼到埋身。認真好彩係上仗對維拉利爾戲劇性反勝，幾乎嚇到“丹爺”鼻哥窿冇肉。兩仗都係先落後兩球，防守集中力明顯有問題，明晨對住拉斯彭馬斯，銀河艦隊都要打醒十二分精神。

    以對手實力，皇馬應可穩奪三分，問題係贏幾多球。初盤皇馬要讓兩球／兩球半，皇馬火力有幾勁毋須多講，啱啱又平咗巴塞所創的連續四十四場有入球紀錄，如無意外今場應該創新高。何況巴利經已復出，BBC又再埋位，今場必向拉斯彭馬斯大屠殺。

    拉斯彭馬斯屬技術型球隊，不過對皇馬等於班門弄斧。且最大弱點係作客，今季聯賽作客十一場只贏過一場，其餘兩和八負。今仗對住主場戰績最勁的皇馬，拉斯彭馬斯劫數難逃。 推介：皇家馬德里4:0