法拉最愛「廠」！各位巴打，講緊嘅係英國長跑好手法拉呀！原來呢位32歲名將係阿仙奴死忠，佢日前喺北京嘅世界田徑錦標賽男子一萬米賽事贏得金牌，賽後除咗將勝利獻畀佢嘅家人同粉絲外，竟然仲獻畀阿仙奴，希望愛隊可以好似佢咁取得勝利：「阿仙奴即將有場對利物浦嘅大戰，希望佢哋可以擊敗對手。」試問同其他人鬥跑完一輪，又有幾多人會仍然心繫自己心愛嘅球隊？法拉堅呀！ 紅軍倒貼送巴神返AC 利物浦方面，被擺入雪櫃多時嘅巴洛迪利日前飛返意大利，據英國傳媒報道，佢係飛去同AC米蘭主帥米赫洛域商討外借一事。1年前正正係A米以1600萬鎊（約1.9億港元）賣「巴神」去紅軍，依家有傳利物浦為咗趕走呢個瘟神，寧願幫「紅黑軍團」出埋人工，若然真係成事，A米今鋪仲唔賺到笑？