柏雷素爾搶W壯行色

因為要遷就下周中亞冠盃8強大戰，柏雷素爾今輪日職主場對松本山雅嘅比賽，提早喺今晚上演。自從柏雷素爾羅致巴甲神射手艾達臣艾維斯後，前線人腳非常充裕，而且個個都弗爆，撞正後防不穩兼殘陣嘅松本山雅，勢必食住個勢贏波為亞冠壯行色，主W穩開。（周四晚6時開賽、馬會網上文字直播）

柏雷素爾近況相當唔錯，近6場聯賽5勝1負，包括日前作客3比0大炒「一哥」廣島三箭，基斯坦奴達施華仲大演帽子戲法，呢位巴西箭頭踏入聯賽次階段已有6球進帳，帶領球隊殺上第三位。其前線拍檔工藤壯人狀態亦唔曳，連同由帕拉尼恩斯來投嘅前鋒艾達臣艾維斯火速入局，喺前一輪聯賽對神戶勝利船聯賽已告開齋，個個射手着晒火，就算有大津祐樹養緊傷，柏雷素爾唔使擔心前面唔夠人用。

松本山雅殘陣唔開胃
相反徘徊下游嘅松本山雅，近期後防又增添多名傷兵，包括谷奧健四郎、後藤圭太及那須川將太都上陣成疑，日前喺主場0比1輸畀名古屋鯨魚已算輸得少。雖然松本山雅每仗都搏甩髀，但弊在球員質素太曳，例如新簽入嘅射手威廉斯辛坦拿，級數就同對方艾達臣艾維斯差好遠，上場甚至連後備上陣嘅機會都冇，難怪佢哋喺次階段打7場輸咗5仗喇。

就算柏雷素爾下周中亞冠8強要主場硬撼中超班霸ＦＣ廣州，但以佢哋咁弗嘅狀態，實在唔使留力，可搵松本山雅祭旗壯行色，主Ｗ乃不二之選，如想博好分頭不妨直取讓球主勝。