藍戰士下盤曼無一失

王遇強愈強
英超開咧冇耐就爆發重量級大戰，今晚曼城同衞冕嘅車路士將會合演聯賽冠軍前哨戰。「藍戰士」新季出閘脫腳，不過領隊莫連奴見慣風浪，近兩季聯賽對住爭標勁敵都未輸過，以夏薩特、迪亞高哥斯達同韋利安嘅超強反擊能力，對住唔識死要搶攻嘅「藍月亮」，真係啱晒胃口。車路士作客受讓平半，2.15倍下盤真係有買趁早！ （now621台周日晚11:00直播）

車路士新球季真係唔多順，先係首輪聯賽打少個兼畀史雲斯逼和2:2，繼而仲爆咗單莫連奴蝦女軍醫嘅新聞，之不過少少風浪又點會考得起莫連奴吖！「寸王」面對強隊特別有計，自2013年重返史丹福橋之後，近兩季聯賽出戰阿仙奴、利物浦、曼市雙雄嘅16仗入面，總共錄得9勝7和佳績，尤其係作客更抱住「贏唔到都唔輸畀你」嘅策略，但求唔輸畀爭標勁敵。況且對上一次「藍戰士」英超開季兩連敗，已經係17年前嘅事，相信車路士再失威嘅機會唔大。

曼城玩搶攻 隨時輸反擊
查實車路士最驚你唔攻，今仗對手曼城崇尚進攻足球，盛傳「藍月亮」前鋒阿古路將會喺今仗擔正，攻強守弱嘅左閘高拉洛夫亦會繼續有正選打，佢哋首戰大炒西布朗3:0之後肯定心雄，今鋪主場出擊實唔會縮，隨時暴露更多空位畀擅打反擊嘅夏薩特、「迪哥」同韋利安都似！再講吖，「藍月亮」首戰考驗唔大，今仗係咪會踢得咁順又係另一回事，隊長高柏尼賽前話希望同胞夏薩特肚瀉喎，連後防領袖都赦咗夏薩特，點搞呀？