打吡博翻身阿仙奴大鬧天宮

阿仙奴連續兩輪英超出戰「倫敦打吡」，今晚作客水晶宮！阿仙奴季前熱身賽喪贏，估唔到開鑼卻出事，吞韋斯咸兩蛋，特別係門將施治連番出醜，隨時影響信心，加上本身防線亦唔算穩陣，即使今仗可以反彈贏波，估計未必保得住清白之身。水晶宮今季簽下幾位高質新兵，踢得有板有眼，可為阿仙奴帶來麻煩，一於揀入球大。（now 621周日晚8時30分直播）

阿仙奴領隊雲格簽下捷克鋼門施治，以為執到寶，但原來係「踩蕉皮」，上仗兩球失波都關佢事，賽後仲被網民狂寸佢係「車仔無間道」。施治孭晒鑊，若然今場再有差池，信心崩潰都似，兵工廠防線有隱憂。與此同時，阿仙奴首仗全失3分，今仗點都要焗攻，務求贏番場漂亮勝仗，重振軍心，以佢哋進攻根基，冇理由再食白果。

水晶宮有信心駁火
水晶宮年初聘請柏杜執教，表現大為進步，今季仲簽入卡比耶、域咸、班福特等新兵，中前場人才濟濟。法國國腳卡比耶上仗入波，助球隊以3比1擊敗諾域治。水晶宮呢類中小型班球隊，最緊要打道氣，新球季開局好，自然會愈來愈有信心，加上眼見韋斯咸都贏到阿仙奴，今仗唔怕都對手駁火。