韋斯咸焗攻靠唔住

前鋒打柴 防線穿窿 新帥停賽
今晚係歐霸盃之夜，英超代表韋斯咸會造訪羅馬尼亞，同艾斯特拉喺第3圈外圍賽再續前緣。「錘仔幫」首回合臨尾香被追和2:2，主力射手安拿華倫西亞仲要傷埋添，黑成咁今晚作客焗攻隨時出事，捧1.52倍「讓主」穩陣喎！（開賽時間：周五凌晨2:00）

韋斯咸首回合喺主場早早領先兩粒，諗住實食冇黐牙啦，殊不知完場前20分鐘內連失兩球，連烏普頓球場班Fans都猛向「錘仔幫」班球員開汽水，就知呢支倫敦球隊踢得幾衰。家陣韋斯咸畀對手拎到兩個作客入球，今晚作客冇得唔採取主動收復失地。

弊在陣中主力射手安拿華倫西亞喺首回合受重創，右膝同右足踝齊傷，保守估計要抖成12個禮拜，加埋另一位鋒將安祖卡路爾亦都養緊傷，「錘仔幫」想攻都有心無力喎！雪上加霜嘅係，後防老大哥占士哥連斯同新帥比歷又要坐波監，今鋪群龍無首，仲點信得過先？

艾斯特拉聯賽留力決心大
反觀艾斯特拉當正今場波係決賽咁踢，呢支羅馬尼亞上游隊伍，剛啱喺本土聯賽面對由赫傑帶隊嘅維托魯干斯坦達，艾斯特拉教頭蘇武迪卡幾乎收起晒成隊主力，擺明為今晚鬥韋斯咸場關鍵大戰留力，咁大陣仗兼咁大決心，莫講話要摸和甩皮甩骨嘅韋斯咸，艾斯特拉贏埋都唔出奇。