倫敦群雄雙龍出海

倫敦除咗係英國嘅首都，更加係多支英超球隊嘅根據地。隨着昆士柏流浪喺上季包尾降落英冠，今季就有5支球隊喺呢度起步，各出奇謀向英超冠軍寶座邁進。其中兩大豪門阿仙奴同車路士，一隊針對性增兵添贏波籌碼，另一隊則不變應萬變，幾乎以原陣去保衞霸業，到底邊支先可以做倫敦一哥兼搶得英超桂冠呢？

阿仙奴上足彈藥只欠「中鋒」
萬事俱備，只欠「中鋒」！經歷連續兩年足總盃冠軍嘅鼓舞後，「兵工廠」阿仙奴嘅「彈藥」已經愈儲愈充足，目前球隊陣容被視為04年不敗奪冠後最勁一季，既有奧斯爾、阿歷斯山齊士同施治等世界級球星孭飛，亦有艾朗藍斯、韋舒亞等新生代上位，阿仙奴離重奪冠軍之夢，可能只差一個「高產量」中鋒。

施治後防定海神針
一直採取「自給自足」經營模式嘅阿仙奴，興建酋長球場嘅債務接近還清後，近年場內場外嘅表現都穩步上揚，前年重金簽入奧斯爾、上年高價買阿歷斯山齊士，巨額投資亦成功換嚟兩個足總盃冠軍。今夏雲格再喺死敵車路士手上撬走捷克鋼門施治，將球隊其中一個較弱嘅位置完美「升呢」。

事實上阿仙奴目前兵力相當雄厚，尤其中場線更加有人滿之患，奧斯爾、辛迪卡索拉、韋舒亞、艾朗藍斯同路斯基都係卡士十足嘅「發電機」，防中位置亦有上季中神奇「爆」出嘅法國小將高基連坐穩，加上傷愈嘅隊長阿迪達同法米尼輔助，如果冇嚴重嘅傷患問題，雲格每場剩係諗出咩人都幾頭痛！

前線方面，「兵工廠」上季有一大段時間靠阿歷斯山齊士單天保至尊，法國前鋒基奧特喺串連同組織上交足貨，不過加盟3季以嚟，聯賽入波分別只得11球、16球同14球，只能講係合格成績，但對於要爭奪聯賽冠軍嘅球隊，絕對有必要加入頂級殺手，雲格心頭好嘅賓施馬、羅拔利雲度夫斯基，會唔會係阿仙奴最後拼圖？

車路士食老本穩中求勝
一向豪慣、使慣嘅車路士領隊莫連奴變「慳佬」，今夏並冇作出大收購，意圖「維穩」保霸業。不過放走施治、杜奧巴同菲臘路爾斯，「挖空」後備力量，此舉實屬「危險駕駛」！事關車仔除咗要衞冕英超，亦要力爭歐聯錦標，加上兩項本土盃賽，4線作戰之下，需充裕兵源支援。莫連奴以原班人腳出擊，無錯水準平穩有保證，但其他勁敵積極增兵，車仔食老本，競爭力相對下降，小心「甩轆」！

莫連奴已成功建立一套穩定陣容，三線人腳平均，上季英超由頭帶到尾捧盃。如果冇傷冇病，當然冇問題，但若有主力受傷或停賽，就會牽一髮動全身。上季就出現過迪亞高哥斯達同雷米都受傷，要老將杜奧巴頂硬上，甚至一度打「無鋒陣」，非常狼狽。加上太依賴同一班正選，容易踢殘主力，難以兼顧多線作戰，上屆歐聯16強出局，「寸王」似乎仲未吸取教訓。

接收「病虎」禍福難料
莫連奴慳皮都算，最離奇係接收「病虎」法卡奧，呢位哥倫比亞射手上季喺曼聯表現一無是處，莫帥搵佢來做迪亞高哥斯達嘅替補，恐怕靠唔住。出售施治畀阿仙奴，等於增強勁敵實力，隨時留後患。加上新簽後備門將比高域級數同施治相距甚遠，一旦泰拔高圖爾斯有乜頭暈身(興)，車「門」勢危。車路士缺乏新血刺激，今季難以帶來驚喜，而且對手洞悉晒佢哋舊招數，衞冕之路好艱巨。