皇馬熱得有道理

季前重量級熱身賽奧迪盃今晚喺德國班霸拜仁嘅安聯球場開打，先由「銀河艦隊」皇家馬德里打頭陣火併英超熱刺。皇馬兩大進攻主力加里夫巴利同莫迪歷今次齊齊首度倒戈舊東家勢成焦點，其中巴利仔近期被新帥賓尼迪斯欽點力捧做一哥，梗係要騷吓哥利證明自己夠料上位；熱刺連美職明星隊都唔夠砌，試問點頂得住呢艘咁重火力嘅「銀河艦隊」先？熱都係咁話，斯維力撐1.73倍讓球主勝。（有線61、64、201及203台周三凌晨零時15分直播）

C朗有傷未有隨隊
自從今夏賓尼迪斯接手皇馬後，就不斷傳出佢勁Like加里夫巴利嘅新聞，「肥賓」想將佢逐步取代已經3張嘢嘅C朗，成為球隊頭號王牌，甚至不惜違背民意，喺占士洛迪古斯、卻奧斯、艾斯高在陣下，依然執意讓巴利仔出任進攻中場，因而被視為「肥賓契仔」。

不過，雖然話有主帥照住，但加里夫巴利都要生性至得，事關之前4場「拍跳」佢埋伏喺中鋒身後，只係貢獻1次助攻咁大把，表現唔多對辦，加上C朗同賓斯馬因傷肯定缺陣，巴利仔係時候做番齣好戲撐「契爺」。而今晚奧迪盃揭幕戰皇馬嘅對手熱刺，正正係加里夫巴利嘅舊東家，呢位威爾斯快翼首度倒戈，還記得兩年前熱刺拖到轉會窗臨閂前先放佢上「艦」，令佢錯過皇馬季前操練，今次狹路相逢必定加多兩錢肉緊搏殺。

熱刺唔弗 級數有距
事實上，同之前被皇馬大炒嘅曼城同國米相比，熱刺嘅級數真係削好多，而且狀態亦唔多掂。上周遠赴美國出戰美職明星隊，話就話對手有卡卡同韋拿呢類球星啫，但仍有「雙特」謝拉特、林柏特同羅比堅尼等大牌缺陣，最終仲要輸1比2，都咪話唔羞家。陣除咗射手哈利卡尼之外，成班波明顯未操弗，況且過去熱刺將「大聖爺」同莫迪歷賣畀皇馬，都特登吊高嚟賣，抬到個價鬼咁高，絕對唔係friend底，今仗狹路相逢未必會留手，讓球主勝咪錯過。