拜仁「讓主」開倉派「米」

失德超盃谷埋成肚氣
啱啱輸咗德超盃，拜仁全隊谷埋成肚火，今晚奧迪盃鬥AC米蘭梗係想做番齣好戲啦！新兵維達爾預計會正選上陣，加埋洛賓傷愈火速撻着，對住「紅黑兵團」可秤先，1.7倍「讓主」值得支持。（有線61、64、201及203周三凌晨2:45直播）

泰國富商Mr.Bee

收購48% AC股份
拜仁喺德超盃先勝後敗，翼鋒洛賓賽後嬲爆話輸得唔抵，呢股怨氣今晚係時候爆發。因肌肉傷缺席季前賽嘅「小飛俠」洛賓，喺德超盃復出即刻數胡，有佢同生力軍杜格拉斯哥斯達雙翼齊飛，火力唔使懷疑，加埋維達爾極有可能喺今晚首度正選登場，拜仁中前場夠晒Power。

對家AC米蘭尋日有單大嘢，就係Mr.Bee正式宣布收購咗「紅黑兵團」嘅48%股份，呢位泰國富商隨即向球迷承諾會大搞，又話即將有錢投資落球會度，Fans聽到梗係開心啦！不過要執靚AC個陣都要時間，新射手卡路士巴卡喺季前賽表現麻麻，中堅阿歷士洛里高又孭鑊多過食飯，攻、守都唔掂隨時輸鑊勁！