馬體會盡砌上海SP

馬體會盡砌上海SP

馬德里體育會「亞洲之旅」第2站，作客中超榜首球隊上海SP（上海上港）！中國富商王健林屬於馬體會主要股東，呢支西甲勁旅訪華，當然要做齣好戲畀老闆睇，費蘭度托利斯、基沙文等球星，勢必出真功夫射爆主隊！上海SP缺少4位參加東亞錦標賽嘅主將，更加難同對手抗衡，揀馬體會讓球客勝。

（有線61、64、201、203台周二晚7時直播）

王健林年初買入馬體會20%股份，並幫助球隊拓展中國市場，對馬體會發展非常重要，會方自然重視今次中國之行，相信會以認真態度比賽，踢悅目足球，吸納更多國內球迷支持。馬體會不乏進攻猛將，除咗最強人氣嘅費蘭度托利斯之外，仲有上季西甲轟入22球嘅基沙文，中場佐治高基上周六喺日本對鳥棲砂岩，更表演開角球直接入網絕技。馬體會進攻板斧多，要撕開上海SP防線並唔困難。

主隊4主力缺陣
上海SP今季演出令人驚喜，現時以1分優勢力壓廣州恒大淘寶，暫居中超榜首。主力自然成為國家隊招攬對象，中場于海、武磊、蔡慧康、門將顏駿凌都入選咗中國隊，出戰東亞錦標賽。上海SP突然冇咗4位骨幹，就唔可以再用往績衡量。事實上，上海SP依家正全力爭奪聯賽錦標，相信今場「表演賽」會留有一手，唔介意畀馬體會做主角。